16 — გასაღები — “ნივთი, რომელსაც როცა ეხები — გრძნობ, როგორია სახლი, რომელსაც ის აღებს და კეტავს”. “ნივთი, რომლითაც ხშირად ტეხენ არყის ბოთლის ბურთულებს და რომლის იმედიც გაქვს მაშინ, როცა ჩანთაში არავითარი იარაღი არ გიდევს, არადა ხვდები, რომ ვიღაც “აგეკიდა”.
17 — სკამი — “სხეული, რომელიც გღლის, როცა ზიხარ და გინდა, როცა არ ზიხარ”. “ნივთი, რომელსაც ყოველთვის სავარძელი გერჩივნა”.
18 — გაზეთი — “რაღაც, სადაც ყოველთვის იმაზე მეტი წერია, ვიდრე გჭირდება და გაინტერესებს”. “ნივთი, რომელზე შეხებასაც ისევე ვერ ვიტან, როგორც ცარცისას”.
19 — სიტყვა — “თავის მართლების ყველაზე მარტივი საშუალება”. “რაც არის უამრავი და გამოუსადეგარი”.
20 — ბოლი — “შთანთქადი სივრცე, რომელსაც თუ ვერ ვხედავ, სიგარეტს ვერ ვეწევი”. “რისი სუნიც მიყვარს”.

6 — კედი — “დაბალძირიანი ფეხსაცმელი, რომელიც შეიძლება მაღალძირიანიც იყოს”. ” რაც გაცვია და ვერ გრძნობ”.
7 — საათი — “ტიკ — ტაკ — ტიკ — ტაკ”. “ნივთი, რომელიც არასდროს ჰკიდია ჩემს ოთახში”.
8 — ჩანთა — “ის რაც ადამიანთან ერთად მოძრაობს და სულაც არ არი ზედმეტი”. “მხოლოდ გრძელყურიანი”.
9 — სამაჯური — “პოპულარული სუვენირი”. “რასაც ვიკეთებ და არ ვიხსნი.”
10 – ბლოგი — “რაღაც, გაზეთის მსგავსი, რომელიც ყველას შეუძლია გამოსცეს”. “სადაც ბლოგერები ცდილობენ წერონ ყველაზე ზაუმნი ფრაზები და სადაც მკითხველები ეძებენ ყველაზე ნაკლებად ზაუმნი ფრაზებს”.

ჩვენ ვეძებთ ცნებების ახალ დეფინიციებს, არა ისეთებს, ლექსიკონებში რო წერია და არც ისეთებს, უფროსები რო აწვდიან ბავშვებს. უფრო რაღაც სხვა — მარტივ ასოციაციურს. მაგალითად, სიტყვაზე — “ტაშტი”, ყოველთვის მიჩნდება რწყევის შეგრძნება, თუმცა, ეს, რა თქმა უნდა, არ ნიშნავს იმას, რომ ჩემთვის ტაშტის დანიშნულება მხოლოდ მასში ჩარწყევაა — რამდენადაც ვიცი, ის უამრავ რამეში გამოიყენება. უბრალოდ — ჩემში ის იწვევს გულის რევის ასოციაციას (შეგრძნებასაც, თუმცა, ეს უკვე სხვა საკითხია). ამის მიუხედავად, “ლექსიკონის” ფორმატი უფრო გასაგები უნდა იყოს იმისთვის, ვინც მას კითხულობს და, შესაბამისად, განმარტება ვერ იქნება ასეთი ტიპის:  ”ტაშტი — რწყევა” . ამიტომ — ვაკეთებთ რაღაც უფრო ვრცელს, მაგალითად:  ”ტაშტი — საგანი, რომელშიც ადამიანებს შეუძლიათ აირიონ გული”.

ყველა დეფინიცია არი სუბიექტური და გასაჩივრებას არ ექვემდებარება.  განმარტებებს შორის არ იქნება არანაირი ლოგიკური კავშირი.  რა თქმა უნდა, თუ უბრალოდ მათ შორის არ აღმოჩნდა დამთხვევა.
პროექტის არაპრეტენზიული მიზანია, დახოცოს თქვენი და ჩვენი დრო, ხოლო პრეტენზიული მიზანი — თითოეულმა ცნებამ მიიღოს საკმარისი რაოდენობის განმარტება.
რადგან სიტყვის გამოყენება შეიძლება სხვადასხვა კონტექსტში, როგორც სხვადასხვა მეტყველების ნაწილი, გამოდის, რომ ამ სიტყვას აქვს უამრავი დეფინიცია.
ხო და რადგან ყველა დეფინიცია არი სუბიექტური, არსებობს იმდენი დეფინიცია, რამდენიც სუბიექტი. თქვენ შეგიძლიათ, გამოგვიგზავნოთ თქვენეული განმარტებები. ეს განმარტებები შეიძლება იყოს ნებისმიერ სიტყვაზე, რომელიც თავში მოგივათ, ან მოგივათ და ძალით მოიყვანთ და აბსოლუტურად არ აქვს მნიშვნელობა, როგორი იქნება ის. მთავარია, იყოს ისეთი, როგორადაც ის მართლა წარმოგიდგენიათ. გარდა ამისა, არც ის არი საჭირო, ტექსტი იყოს სასაცილო ან “ორიგინალურად განსხვავებული”. ჩვენ შეგვიძლია გადავხედოთ და გამოვაქვეყნოთ. სურვილის შემთხვევაში, თითოეულ თქვენს განმარტებას ექნება საავტორო უფლება. ჯერ — ჯერობით “ლექსიკონს” ორი ანონიმური ავტორი ყავს. შესაბამისად, ყველა სიტყვას ორი განმარტება აქვს. პრობლემას არ წარმოადგენს ის ფაქტი, რომ გახდეთ მესამე. ასევე, თქვენ შეგიძლიათ email-ზე გამოგვიგზავნოთ თქვენს მიერ შედგენილი “word list” (სტანდარტულად — 10 სიტყვა. თუმცა, არსებითი მნიშვნელობა არც ამას აქვს), თქვენთვის საინტერესო სიტყვებით (გამოგზავნამდე, გადახედეთ უკვე არსებულ სიტყვებს), რომელზეც ჩვენი (ან — უბრალოდ, სხვისი) დეფინიციები დაგაინტერესებთ. ასე რომ, პროექტში მონაწილეობის მიღება ნებისმიერი გზით არი შესაძლებელი.